كود الرباط//

فالمسيرة الحاشدة لي نظمو الإسلاميين اليوم فالرباط، وللي مقدروش يوصلوها لـ100 ألف مشارك، كانت تنفيس بسيكولوجي  وسياسي ليهم حيث شحال هادي مداروش مسيرات ووقفات تضامنا مع قضية وجودهم “القضية الفلسطينية”.

شهادات من مشاركين كتبين كيفاش كانوا مخنوقين وشي وحدين طلقو السلوكية بزاف منهم لي قال باغي يجاهد براسو ومالو وعائلتو وولادو وكيطالب بفتح الحدود. الهضرة بزاف.

دبا هادو لي باغين يجاهدو وكيطالبو الدولة تفتح الحدود، واش الدولة سدات شي حدود، لي بغا يمشي لفلسطين يمشي بفلوسو مكاين لي منعو. غير فين ومنين يدخل، كولشي ساد. معبر رفح مغلق.

هادو كيديرو مزايدات، كون خدمو شويا العقل هوما عارفين بلي يستحيل دبا يمشيو يدخلو لفلسطين ولا لغزة. وعاد كاين للي من بين المشاركين فالمسيرة جا قبالت البرلمان لابس ملابس عسكرية وهاز صواريخ وقذائف كرطونية إسوة بعناصر كتائب عز الدين القسام والجهاد الإسلامي.

اليوم خرجو الإسلاميين والاتباع ديالهم كيغوتو بحناجرهم، طالبو بإلغاء التطبيع. نفترض أنهم تقريبا 60 ألف مشارك يعني راه مكيمثلوش حتى 0.1 فالمائة من الشعب المغربي. في حين أن الارقام الرسمية تفيد بلي عدد المشاركين مفاتوش 20 ألف متظاهر. نسبة قليلة قدام الشعب.