كود الرباط//
وزارة التربية الوطنية والتعليم الأولي والرياضة، فندوة صحافية اليوم الجمعة 19 شتنبر، عرضات مستجدات الدخول المدرسي الجديد وكشفت على حصيلة مهمة فمشروع “مدارس وإعداديات الريادة‘‘.
الوزير محمد سعد برادة قال باللي عدد مدارس الريادة فالسلك الابتدائي هاد العام وصل لـ4626 مدرسة، كيقراو فيها أكثر من جوج مليون تلميذ. هاد المؤسسات كتجمع 75 ألف أستاذ وأستاذة، وزيد عليهم 960 مفتش و1000 إطار للتوجيه، وكاين حتى 360 منشط للأنشطة الموازية و6.000 أستاذ منسق.
الوزارة جهزات 32 ألف حجرة دراسية بالوسائل البيداغوجية، ودارت مناهج الدعم المكثفKits TARL، وزادت وفرت كتب مدرسية بثمن جد مناسب كيتراوح ما بين 4 و12 درهم ف سلك الابتدائي. وبرادة أعلن حتى على منحة بـ10.000 درهم صافية للأطر اللي منخرطين فالمشروع وكيستوفيو الشروط.
أما فمستوى الإعداديات، العدد ديال “إعداديات الريادة” وصل لـ786 مؤسسة، كيدرسو فيها حوالي 700 ألف تلميذ. هاد المؤسسات كتضم 25 ألف أستاذ وأستاذة، و700 مفتش و780 إطار للتوجيه. الوزارة أهلات وجهزات 554 إعدادية رائدة جديدة بالحواسيب والمساليط الضوئية، وحسّنت الربط بالأنترنيت وفعّلت خدمات الصيانة.
ومن بين التدابير الجديدة، كاين آلية ديال اليقظة فكل إعدادية باش يتعرفو على التلاميذ اللي مهددين بالانقطاع وكيواكبوهم باش يتفادو الهدر المدرسي. وبرادة وضّح أن البرنامج شمل حتى مدارس صيفية خاصة بالتلاميذ اللي كانو مهددين مايلتحقوش بالقراية، مع تنظيم أنشطة موازية باش يطوّرو الكفايات العرضانية والمهارات الذاتية.
