كود كازا ///

علمت “كود” باللي وزارة الداخلية عطات مارشي فيديو كيلخص الجولات اللي دارتها بعد خطاب سيدنا على الفوارق المجالية، لوكالة “پي ار ميديا” ديال فاطمة الزهراء اوتاغاني. المارشي دارت ليه مناقصة وخذاتها هاد الوكالة.

المشكلة كاينة باللي هاد الوكالة كان عندها مارشي كيهم كورونا ولكن باش تورطات فامور ضد الادارة العامة للامن الوطني حيدو ليها المارشي وحتى المسؤول على التواصل ديال الداخلية انذاك ما جددوش ليه بعد ما وصل للتقاعد.

اليوم رجعات هاد الوكالة وخدات مارشي مهم. غادية تصايب فيديو من ليروش اللي وجداتهم الداخلية. المشكلة ما عندش هاد الوكالة شي واحد فيدو واحترافي يصايب هاد الفيديو، مشاو كيعيطو على حرافية ومهنيين ولكن ما بغاوش ليهم. دابا واش باش تقدمو للمارشي كانو دايرين اسماء هاد لحرافية ولا للا. الداخلية اللي تقول لينا

المارشيات خاص ياخدهم شركات حرايفية ماليها عايشين فالمغرب ماشي بحال مولات “پي ار ميديا” اللي عايشة رجل هنا ورجل فماربيا جنوب الصبليون. حتى اللي مكلفاهم بالادارة فيهم شي وحدين ضعاف وما يقبل عليهم حد

سيدنا كان دار خطاب ف29 يوليوز 2025 بمناسبة عيد العرش دعا فيه “لإحداث نقلة حقيقية، في التأهيل الشامل للمجالات الترابية، وتدارك الفوارق الاجتماعية والمجالية” و”الانتقال من المقاربات التقليدية للتنمية الاجتماعية، إلى مقاربة للتنمية المجالية المندمجة” وان “تشمل ثمار التقدم والتنمية كل المواطنين، في جميع المناطق والجهات، دون تمييز أو إقصاء”.

ووجه الحكومة “لاعتماد جيل جديد من برامج التنمية الترابية، يرتكز على تثمين الخصوصيات المحلية، وتكريس الجهوية المتقدمة، ومبدأ التكامل والتضامن بين المجالات الترابية” وشدد على ان هاد البرامج خاص يكون اساسها “وحيد جهود مختلف الفاعلين، حول أولويات واضحة، ومشاريع ذات تأثير ملموس”