الرئيسية > كود-تيفي > “الخير اللي تدير فيه هو ما تعطيهش”.. الصداع نايض بسباب پانو ديلل جمعية “جود” ضد الصدقة على الدراري الصغار اللي كيسعاو.. ورئيسة الجمعية كتوضح عبر “كود”: ماخصش تعطى ليهم الفلوس باش مايساليوش فالزنقة ومانزيدوش من تفاقم الظاهرة – فيديو
17/03/2021 20:00 كود-تيفي

“الخير اللي تدير فيه هو ما تعطيهش”.. الصداع نايض بسباب پانو ديلل جمعية “جود” ضد الصدقة على الدراري الصغار اللي كيسعاو.. ورئيسة الجمعية كتوضح عبر “كود”: ماخصش تعطى ليهم الفلوس باش مايساليوش فالزنقة ومانزيدوش من تفاقم الظاهرة – فيديو

“الخير اللي تدير فيه هو ما تعطيهش”.. الصداع نايض بسباب پانو ديلل جمعية “جود” ضد الصدقة على الدراري الصغار اللي كيسعاو.. ورئيسة الجمعية كتوضح عبر “كود”: ماخصش تعطى ليهم الفلوس باش مايساليوش فالزنقة ومانزيدوش من تفاقم الظاهرة – فيديو

عفراء علوي محمدي – كود//

صداع كبير نايض على مواقع التواصل الاجتماعي بسبب بانو تحسيسي لجمعية Jood لإيواء المتشردين، للحد من استغلال الدراري الصغار فالسعاية، مكتوب فيه أن “الخير اللي تدير فيه هو ماتعطيهش”، و”بلاصتو ماشي فالزنقة”.

مجموعة من النشطاء ماتقبلوش الميساجات اللي فالبانو، وشافو أن هذشي ماشي معقول، بحكم كاينين أطفال محتاجين دوك الفلوس وكيعيشو فواقع الفقر والهشاشة، وكان متشردين وبدون مأوى وبدوك الفلوس يقدرو يشريو ما ياكلو ويعيشو.

فردها على هذ الانتقادات، وضحات هند العايدي، رئيسة الجمعية، أن هذ البانو اللي تدار ف9 مدن مغربية جاي فإطار حملة لمحاربة التسول بالأساس، باش مانبقاوش مازال نشوفو الوليدات الصغار كيطلبو فالزنقة فالوقت اللي مكانهم الأصلي هو المدرسة، “وفهذ لافيش كاين رابط على الحملة ديالنا، وكنت تمنيت هذ الناس اللي هاجمونا يدخلو ليه ويشوفو الفيلم القصير اللي درناه، على هذشي، باش يفهمو مزيان علاش ماخاصش يتعطاو الفلوس لهذ الدراري الصغار”.

وزادت العايدي، فتصريحها ل”كود”: “كون تبعو الحملة ديالنا والكور ميتراج والمعطيات اللي عرضنا بالارقام على التسول دالأطفال فالمغرب، وجاهوم منطقي انهم يعطيو ليهم الفلوس، بلا مايحسو انهم ظلمو هذ الوليدات وضيعوهم، وبلا ما يفهمو أنهم ضحايا دواليديهم والناس اللي كيستغلوهم، إذن يعطيوهم”.

وشافت العايدي أن الحل الوحيد لدوك الولاد باش مايتستغلوش، ولهذ الواليدين اللي علموهم يمدو يديهم وقتلو كرامتهم وحرموهم من قرايتهم، وباش مايساليوش فالزنقة، هو مايتعطاوش ليهم الفلوس، “حيت إلى ماعطيناهمش، ماغيعاودوش يتكراو، وماغيتستغلوش”.

وقالت أنه اللي باغي يصدق، يقدر يصدق فلونتوراج ديالو على العائلات اللي عارف انهم مافحالتهمش، واللي عارفين وضعيتهم الحقيقية، “الناس اللي باغة تصدق تمشي لباب السبيطارات، تشوف اللي جاهم المرض على غفلة وماعندهم باش يتعالجو، تخلص الكارني دالعائلات اللي كتشري غير بالكريدي حيت مافحالتهمش، ماشي السعاية اللي كيصورو باستغلال الأطفال القليلة 12 ألف درهم للشهر”، على حساب كلامها.

فيلم قصير على ضياع مستقبل الأطفال فعالم التسول

وفحملة جود ضد تسول الأطفال، دارت Jood كور ميتراج تعبيري وتحسيسي على ظاهرة استغلال الأطفال فالسعاية، وهو فيلم “شوك المحنة”، اللي من إنتاج سينياتير برود، وإخراج يونس الراقي، بمشاركة خديجة أسد وهند السعديدي.

كيحكي الفيلم القصير قصة طفل تدمرات حياتو بسبب السعاية، وكيفاش كانت شي سيدة كتعطف عليه وتعطيه لفلوس، لكن فآخر المطاف كيدي هذ الفلوس لمو وناس خرين كيستغلوه، وكيفاش أنه كيشيط منها باش يشم السيليسيون ويتقرقب، وبقى فهذ الحالة حتى خرج للزنقة وتشرد وضاع، وفآخر المطاف لام السيدة اللي كانت كتعاونو، وقال ليها أن “فلوسها خرجو عليه”.

66 فالمية من اللي كتستغلو قل من 4 سنين.. أرقام كتخلع على سعاية الأطفال

ففيديو تعريفي لأهداف الحملة والغرض منها، كيشرح كثر علاش ماخصش يتعطاو لفلوس للأطفال اللي كيسعاو بلغة الأرقام، كتقول هند العايدي أن اليونيسف ف2015 كشفات أن 25 ألف طفل متشرد كاين فالمغرب، وأن الأمن الوطني شدو ف2016 تقريبا 8600 واحد فخلية ديال المتسولين، ومنهم 1177 قاصر، وان وزارة التضامن نضمات حملة ف2020 عتقات من خلالها 142 طفل صغير من السعاية.

وكتقول أن 66 فالمية من الاطفال اللي كيتم استغلالهم اقل من 4 سنين، و26 فالمية أقل من عام، وأن هذو اللي قل من عام ماكيحظاوش برعاية جيدة، بل مينعسوهم باش يسعاو بيهم فراحتهم.

وحسب البحث اللي دارت Jood، فكل مرا كتسعى بولد كتصور 350 درهم، وهذ الولاد كيتكراو ب150 درهم، الشي لي كيعني أنها كتقد تصور حتى ل500 درهم فالنهار، والدري كيتحرم من المدرسة، وكيتم الإساءة ليه وقتل كرامتو، وكيصدق هو اللي كيضمن رزق واليديه وكيجيب ليهم الفلوس عوض ما يكون العكس.

https://www.instagram.com/tv/CMeU5hcBSoT/?igshid=1uj5o70f2nb4c

موضوعات أخرى

23/09/2021 22:21

عاجل.. سالا الكلام: عمدة الرباط داتها اسماء اغلالو والاجتماع فدارها باقي مسالاش بحضور الطالبي وأوزين وها كيفاش كولشي تحسم