عمر المزين – كود///

قال حسن عاطش، رئيس الغرفة النقابية للصيادلة بفاس، فتصريح لموقع “كود”، بأنه فواحد التطور جديد كيعكس تصاعد التهديدات اللي ولاّت كتستهدف الصيدليات بمدينة فاس، تعرضات صيدلية “البركة” البارح الخميس لعملية اقتحام هي الثالثة من نوعها، وكيُشتبه يكون نفس الشخص هو اللي وراها، حسب تصريحات الصيادلة اللي تعرّضو للاعتداء.

وحسب المعطيات المتوفرة، أوضح عاطش لـ”كود” أن الجاني، اللي كيتعوّد يخبّي ملامحو بكمامة طبية، استغل الظلام ديال الزنقة وانشغال مساعدتي الصيدلية فجرد حصيلة المبيعات، قبل ما يفاجئهم وهوما فحالة خوف وذعر، وهو كيلوح بسلاح أبيض، الشي اللي خلاّهم يستسلمو.

وأضاف رئيس الغرفة النقابية، في ذات التصريح لـ”كود”، أن هاد الوضع خلاّ الجاني يتحرك بحرية داخل الصيدلية، واستولى على مبلغ مالي مهم، ومن بعد هرب بلا ما تلقى أي مقاومة.

وأمام تكرار هاد الحوادث الخطيرة، أكد حسن عاطش أن الغرفة النقابية لصيادلة فاس كتدق مرة أخرى ناقوس الخطر، وكتطالب السلطات المختصة بالتدخل العاجل باش يتم إلقاء القبض على الجاني، اللي ولى كيشكل مصدر رعب وسط المهنيين، واتخاذ الإجراءات اللازمة لضمان سلامة الصيادلة والمستخدمين ديالهم، وحماية ممتلكاتهم.