كود سبور//

عبر الدولي المغربي بلال الخنوس على الفرحة ديالو حيث جا للمنتخب المغربي استعدادا لمواجهة كل من الگابون وليسوتو، وعبر أيضا على الفرحة حيث انتقل من بطولة بلجيكيا إلى البطولة النگليزية.

وقال بلال الخنوس فتصريح للموقع الرسمي ديال الجامعة الملكية المغربية لكرة القدم: “بعد الإنجاز اللي حققت مع المنتخب المغربي فأولمبياد باريس2024، رجعت للفريق ديالي السابق جينك البلجيكي، قبل ما ننتقل لليستر سيتي النگليزي، وأنا فرحان بزاف حيث غانلعب فبطولة النگليز وعائلتي فرحانين بيا ونتمنى ندير حوايج كبار، وفالمغرب عندنا مواهب كبيرة وبالخدمة نقدو نديرو حوايج كبار”.

وكمل بلال الخنوس: “فرحان بزاف حيث جيت للمنتخب وتلاقيت مع اللاعبين ومنهم اللي كانوا معيا فالألعاب الأولمبية وغانوجدو مزيان باش نربحو هاد الجوج ماتشات الإعداديين لكوب دافريك داكشي علاش مهمين، كانشكر الجمهور المغربي اللي ديما معنا وكايشجعنا واخا المسافات اللي كاتكون بعيدة”.