سهام البارودي – كود//

اكثر ثلاثة الأنواع د الحبوب كاتنتج فالعالم هي الذرة (الماييس)، القمح والروز! وكايشكلو ثلاتة د الثقافات غذائية لي مسيطرة فالعالم: ثقافة الروز كاينة فآسيا وزحفات حتى لإفريقا فوقت التجارة الثلاتية وثقافة الذرة كاينة فأمريكا وثقافة القمح كاينة فدول البحر الأبيض المتوسط وأوروبا!

حنا حيت جينا على البحر الأبيض المتوسط القمح كايشكل شي حاجة مهمة لينا فالتغذية ديالنا، والمغاربة كايصايبو بالقمح بزاف ديال الحوايج وأهمها الخبز! صديق المغاربة، مايمكنش تدخل لشي دار وماتلقاش الخبز وحتى أنا كنت من عشاق الخبز لدرجة فاش جات كورونا وسدّو علينا تعلمت نعجن أنواع الخبز حتى خبز “الفوّة” عجنتو!

زوين الخبز وشهي وكبرنا بيه وولَفناه فحال شي واحد من العائلة، كاينة واحد القداسة عند الخبز ماعند حتى شي ماكلة اخرى، لدرجة أنه لالقيناه فالزنقة كانبوسوه ونحطوه فالجنب والخبز عند الأغلبية ماكايتلاحش فالزبل لا كادار ليه ميكة ديالو بوحدو، تقدر تلوح نص دجاجة فالطارو د الزبل والخبز لا! والعلاقة وطيدة بزاف بين المغاربة والخبز لدرجة الاطباق لي كايتكالو بلا خبز قلال بزاف (يعدون على رؤوس الأصابع) من غير كسكسو وبركوكش والرفيسة وشي تواشا قلال! أما الأغلبية الساحقة د الأطباق والوجبات ديالنا راه مايمكنش تاكلهم بلا خبز: لوبيا، عدس، طنجية، طاجين، دواز… فاش كاتجي تشوف كاتلقاه ماشي كانكملو بيه الماكلة بل هو الأساس ديال الماكلة !

وهنا فين كاينة المشكلة، فداك النسبة لي كايشكلها الخبز فالوجبات اليومية د المغربي لا مبدا، كاتلقى الأسرة مجموعين على طاجين فيه شوية د اللحم وشوية د الخضرة والمرقة وبزاف د الخبز! كاين لي كايضرب خبزة فكل وجبة وكاين لي جوج! والخبز كايتكال فالفطور وفلغدا وفلعشا وفرمضان وفالعراسات والسبوعات والگنايز!

الخبز اليوم راه هوا أخطر حاجة على المغربي، حيت عوض أنه ياكل الخضرة واللحم والدجاج والحوت والفواكه كاياكل الخبز لي من غير شوية د الألياف والسكريات والدهون مافيه حتى شي فائدة غذائية كبيرة.

ولكن عاوتاني فاش كاتجي تشوف كاتلقى أن الخبز هو لي ضامن الاستقرار فالبلاد حيت نهار بزاف ديال المغاربة غايحيدو الخبز من الطبلة ديالهم تما فين غايعرفو درجة الزلط الحقيقية لي كايعيشو فيها، وأنهم كايستعملو الخبز باش يكاليو الجّوع! وأنه هو الوجبة الحقيقية ماشي الطاجين ولا الگاميلة ولا الطنجية …

شوف غير الدغمة فيد المغربي، كاتلقى النص ديالها خبز إلى ماكانش اكثر، وشوية د الخضرة ممعوسة مع شنتيفة د اللحم لي ماغايديرهاش فكل دغمة!

نهار غايحيد المغربي الخبز من الطبلة تما فين غايعيق بالقالب لي سنين وهو جالس عليه.