كود كازا//

عدد كبير من الناس اللي كيتبعو حملة تحرير الملك العمومي اللي دايراها السلطات فعمالة مقاطعة الحي الحسني، تفاجئو من التصرف ديال واحد من نواب رئيس المقاطعة، خصوصًا فواحد الفضاء اللي معروف بالعشوائية والبشاعة فالمنطقة.

النائب الأول لرئيس المقاطعة، اللي هو حتى برلماني كيمثل الحي الحسني باسم حزب الاستقلال، دار موقف غريب وخايب تزامن مع الحملة، ووقف فوجه السلطات ومنعهم من يكمّلو الخدمة ديالهم فـ “سوق دالاس”، اللي هو سوق عشوائي معروف بالفوضى والبناء العشوائي، وعامر اختلالات وخروقات.

المهم واحد الفيديو اللي كا يروج من البارح الجمعة، وتوصلات بنسخة منو جريدة “كود”، بان بوضوح أن نهار الخميس اللي فات، السلطة المحلية كانت كتهدم شي محلات عشوائية وسط السوق، وفجأة تدخل النائب البرلماني وبدا كيمنع أعوان السلطة يكملو الخدمة ديالهم، وهو التصرف اللي بزاف ديال الناس شافوه بحال تحدّي لقرارات ولاية جهة كازا-سطات اللي كتحاول تحارب العشوائية واستغلال الملك العمومي.

واحد الفاعل الجمعوي فالحي الحسني صرح لجريدة “كود” وقال أن هادشي اللي دار النائب البرلماني ماشي غير تدخل فخدمة السلطة، بل تحريض للناس باش يعارضو عمليات الهدم، وحتى تحريض على البناء العشوائي، وهادشي ما كيتماشاش مع الدور ديال نائب رئيس المقاطعة اللي خاصو يكون مساند للسلطة ماشي ضدها.

بسبب هاد التصرف، بزاف ديال فعاليات المجتمع المدني فالحَي الحسني طالبو العامل بالتدخل وبمساءلة النائب على التصرفات ديالو، حسب ما كينص عليه القانون اللي كينظم العمل الجماعي.

الفعاليات قالو كذلك أن هاد الحالة كتنطبق عليها شروط العزل، بحيث المستشار دار أفعال كتخالف القوانين وكتمس بأخلاق المرفق العمومي ومصالح الجماعة، وزاد عليها أنه كيخلط المصلحة العامة بالمصالح الخاصة، وهادشي ممكن يؤدي لتنازع المصالح.