كود سبور//

تفرگع رضوان الحيمر مدرب شباب السوالم على اللاعبين ديالو بسبب الخسارة مع الوداد الرياضي، البارح السبت فتيران العربي الزوالي برسم الدورة 14 من البطولة الاحترافية لكرة القدم.

وبعد خسارة السوالم مع الوداد بثلاثة لزيرو، قال رضوان الحيمر في تصريح له: “مبروك للوداد على الرباح، ولكن كيفما شفتو أحسن لاعب فالماتش كان هو الگول ديالهم يعني أن الفرص اللي جاتنا كانت كثر من الفرص اللي جاتهم ولكن هما ماركاو وحنا ما ماركيناش، وماشي أول مرة كايوقع لنا هذا الشي فايت وقع لنا ضد فرق آخر”.

وكمل الحيمر وقال: “كانزگلو بزاف وكايتماركاو علينا أهداف بسهولة وبالنسبة ليا هذا الماتش المهاجمين هما اللي دارو فيه الفرق، حنا جاونا فرص وضيعنا وهما جاوهم نص فرص وماركاو هنا كايبان الفرق فإمكانيات اللاعبين والمشكل ديالنا كانوصلو للمرمى وما كانماركيوش وإلى ما ماركيتيش ما غاتربحش، وإلى غلطتي غايتماركا عليك وهذا هو السيناريو اللي وقع”.