كود سبور//

ولاو لاعبين الرجاء الرياضي أنس الزنيتي ورودجر أهولو مهددين بالعقوبة، حيث تخاصمو مع جماهير الرجاء الرياضي ملي سالا ماتش الفريق مع السوالم يوم السبت فتيران المحمدية ضمن الدورة 9 من البطولة.

وبعدما سالا الماتش بين الرجاء الرياضي وشباب السوالم بنتيجة التعادل زيرو لزيزو، ناضو شي حياحة من هادرك اللي كانو باركين فالمنصة والمنطقة المغطية من تيران البشير، وماشي الألتراس والكروبات اللي كيشجعو، (ناضو) بداو كيعايرو فاللاعبين وهذا الشي كاين من الكوايرية ديال الرجاء اللي تحملو وحدر راسو وسكت وكاين اللي ما استحملش المعيار وسبان بحال الكول انس الزنيتي الكابيتان ديال الفريق ورودجر أهولو، اللي بداو كيردو على الحياحة بالسبان وبحركات غير اخلاقية كيفما بان فالفيديوهات اللي انتشرت لهم على مواقع التواصل الاجتماعي.

وهذا الواقعة ممكن تخلي الرجاء الرياضي يخسر جوج لاعبين مهمين حيث ممكن العصبة الوطنية لكرة القدم الاحترافية تعيط لهم له باش يدوزو عند اللجان التأديبية ديالها، وتقدر تصدر فحق اللاعبين عقوبات كالغرامة والتوقيف، والخاسر الكبير هو الرجاء والجمهور ديالها الحقيقي.