عثمان الشرقي ـ كود//
فكازا، مراكش، فاس، الرباط، ومدن صغرى، الحومة تبدلات. ما بقاتش ذيك البلاصة اللي كتجمع الجيران على الهدوء والطمأنينة. اليوم، كتفيق من 8 دالصباح على المطرقة، الكريك، غوات التلامذ، ولا صوت الكونفلور. الطوموبيلات كيسدو الزناقي، طريطوار رجع كراج، وكاع هاد الشي قدّام السلطات.
اللي خدامين فالليل، العدايز، المرضى، ولات عندهم معاناة يومية. العائلات كتقلب تهرب للخلا باش تتهنا من صداع “السكن الحضري”. ولكن واش السكن ولى امتياز ماشي حق؟
المدارس ولات متارس
المدارس الخاصة ولات كتفتح وسط أحياء شعبية، بلا تيرانات، بلا مخرج طوارئ، بلا احترام لعدد التلاميذ، ولا حتى لبنية الحي. تلامذ كيغوتو قدام البيبان، طوموبيلات كايسدو المنافذ، والناس ما قادرة لا تنعس لا ترتاح. التراخيص كتتوزع بلا دراسات، بلا تتبع، بلا مراقبة. واللي متضرر هو المواطن، وشحال من واحد باغي يبيع دارو بسباب صداع المدارس الخاصة.
ورشات بلا شروط… طريطوار ولى شانطي
مول البونج، ميكانيك، نجارة، الكرتوميناجي… كولشي ولى وسط الحومة مسيطر على الطريق قدامو كاين محلات فيهم جوج متر على جوج، كتخدم فالصيانة الميكانيكية، بحالها بحال گاراج. كيفاش؟ بلا تهوية، بلا عازل صوت، بلا شروط السلامة، وخا دفتر التحملات كينص على كل هاد المعايير.
الرصيف ولى تابع للمحل، والزنقة تحوّلات لورشة مفتوحة، فيها الزيوت، المتلاشيات، الماكنات الثقيلة، وكلشي ساكت. الراجلين ولات حياتهم فخطر، والسلطات كتغَمّض عينيها.
القانون كاين والتنفيذ غايب
القانون التنظيمي 113.14 واضح: الجماعة مسؤولة على التنظيم الحضري قانون التعمير كيمنع استغلال أحياء سكنية فأنشطة مهنية بلا رخص صارمة دفتر التحملات ديال المهن كينص على احترام المساحة، العزل، الترخيص، والسلامة.
ولكن فالميدان؟ فوضى، تغماض عين، وتسيب مقنّن. المحلات كتفتح، الأنشطة كتخدم، ولا حد كيسول على الشروط، ولا كيراقب هاد المهزلة.
المغاربة القدام كانوا منضّمين أكثر من اليوم
فكل المدن العتيقة، كان التنظيم الحضري مبني على العقل والتجربة. كل حرفة عندها مكان خاص بها، مفصولة على السكن.
زنقة الحدادين، سوق النجارين، العطارين… التنظيم كان تلقائي، لكن فعّال اليوم، رجعنا كنتخبطو فالعشوائية، وسط قانون ما كيطبقش اللي سبقونا ما كانوش عندهم لا قوانين تنظيمية ولا ميثاق حضري، ولكن كان عندهم منطق واحترام لراحة الناس. وحنا اليوم، عندنا قوانين، ولكن ما عندناش تطبيق
الصداع كيهدم الأعصاب والعلاقات
العيش وسط الضجيج اليومي والورشات كيسبب مشاكل نفسية حقيقية. الناس ما كينعسوش مزيان، كيتعصبو، كيتوترو، وكيولّيو يهربو من ديورهم. الأطفال ما كيركزوش، والشيوخ كيتأذّاو صحياً.
الدكتور المريني، أخصائي نفسي كيقول للݣود:
“التعرض المستمر للضجيج وعدم القدرة على التحكم فيه يؤدي إلى زيادة مستويات التوتر والقلق عند الناس. هذا التوتر المزمن يؤثر على جودة النوم والتركيز، ويسبب مشاكل صحية ونفسية متعددة. العيش في بيئة غير هادئة يضعف الروابط الاجتماعية ويؤدي إلى تدهور العلاقات بين الجيران.”
الدولة خاصها ضمن السكينة وتنضم المهن
الدولة خاصها تتحرك بجدية ووضوح. خاصها تراقب المدارس الخاصة والورشات اللي كتخدم وسط الأحياء السكنية. ما خاصش يتساهل مع أي نشاط بلا رخصة أو مخالف للقانون. خاص تكون مناطق صناعية مخصصة للحرفيين، بأثمنة مناسبة، باش ما يبقاوش يديرو خدمهم وسط الزناقي والأحياء السكنية. التعليم الخصوصي خاصو يكون منظم بدفتر تحملات واضح وصارم، يحمي الساكنة ويضمن حق التلميذ. والرصيف والملك العمومي خاصهم يرجعو للناس، وما يبقاش أي واحد يحتلهم بلا حق. إذا الدولة ما دارتش هاد الخطوات، الفوضى غادي تكبر، والساكنة غادي تبقى تعاني أكثر.
الحاصول:الحومة ماشي وزين، ماشي ورشة، ماشي مدرسة عشوائية. الحومة خاصها ترجع حي، بلا صداع، بلا فوضى، وبلا احتلال.
الدولة خاصها تتحرك اليوم، وتسن تشريعات تحمي فيها الفضاء المشترك وتنضم محلات مزاولة المهن وفق دفتر تحملات صارم كيعاقب كل من خالفو.
