الرئيسية > كود سبور > الحمرا حمرات للمغرب وجهو. ضمنو تقريبا النهاية فعصبة الابطال. جابو الرباح من انگولا وب3
07/05/2022 15:00 كود سبور

الحمرا حمرات للمغرب وجهو. ضمنو تقريبا النهاية فعصبة الابطال. جابو الرباح من انگولا وب3

الحمرا حمرات للمغرب وجهو. ضمنو تقريبا النهاية فعصبة الابطال. جابو الرباح من انگولا وب3

مصطفى الشادلي – كود سبور ///

بلواندا العاصمة الانغولية ربح الوداد البيضاوي على بيطرو انتلتيكو. حط رجلو فنهاية عصبة الابطال. رباح كبير حققاتو الحمرا فذهاب نصف نهاية عصبة الابطال الافريقي.

60 الف مشجع كلهم كيشجعو فرقتهم بيطرو فملعب 11 نونبر وزيد عليها 31 درجة٬ ما قدروش على الوداد. كان منظم وفعال ومقاد فخطوطو. ربح وقنع.

الماتش بدا مزيان للحمرا. ماركات البيت اللول فالدقيقة 16. ماركاها ليال لعاب بيطرو على مرماه. هاد الهدف الاول خلى ثقة اكثر للحمرا. فالدقيقة 45 من الشوط الاول زاد جبران الهدف الثاني.

دوزيام ميطا بغى النادي الاونگولي يضغط ولكن هجوم مرتد خلى الحمرا تزيد هدف ثالث. ماركاه مبينزا فالدقيقة 67.

وفالدقيقة 81 وبعد خطأ من حارس الحمرا التگناوتي سجلات بيطرو گول. ماركاه جوب اسطابو.

فرقة انغولا كملات ب10 لعابة بعد طرد دا سيلفا فالدقيقة 91.

بهاد النتيجة تكون الوداد ضمنات التأهل بنسبة كبيرة. واخا تخسر بجوج لزيرو فمركب محمد الخامس الجمعة الجاية راه الوداد مؤهلة.

طبعا الحمرا اللي حمرات وجه المغرب غادية تلعب ماتش باش تربح. باش تمشي لنهاية عصبة الابطال بانتصار كبير. الجمهور لكبير اللي غادي يكون حاضر غادي يساعد الفرقة مزيان

موضوعات أخرى