كود الرباط//

كشف أحمد الحليمي، المندوب السامي للتخطيط، عن تفاصيل جديدة بخصوص إجراء الإحصاء العام للسكان برسم سنة 2024، بحيث غايبدا تكوين الأطر لي غادير الإحصاء من مارس وغايستمر التكوين 4 شهور باش يكونو واجدين لشهر شتنبر التاريخ لي غايبدا فيه الإحصاء.

وقال الحليمي، اليوم بمجلس النواب أثناء تقديم مشروع الميزانية الفرعية للمندوبية السامية للتخطيط، بلي 55 ألف شخص غايتم تكوينهم من طرف جامعة محمد الخامس بالرباط، وغايكون ممثلين عن كل جهة.

وأفاد المسؤول بلي غايتم شراء 55 ألف طابليت لغرض الإحصاء، لمدة شهر ومن بعد غايردو هاد طابليتات لوزارة التعليم.

وكشف الحليمي بلي ملقا حتى مؤسسة تقدر تجاوب معنه فميدان تكوين المكلفين بالإحصاء، وفالأخير مشاو عند جامعة محمد الخامس العريقة للي عندها تجربة فالتكوين.

هاد 55 ألف شخص لي غايتم تكوينهم غايدي يدار ليهم كونكور باش تكون الصرامة فالاختيار حسب احمد الحليمي.