كود الرباط//

قال أحمد الحليمي، المندوب العام السامي للتخطيط، بأن الاحصاء العام للسكان سنة 2024 معندوش علاقة نهائيا بأي برامج الدعم الاجتماعي، ولا بالمؤشر الخاص بالسجل الاجتماعي.

وأوضح الحليمي، في ندوة صحفية مخصصة لانطلاقة عملية الاحصاء،  مساء اليوم، بأن الأسئلة لي كيتم طرحها فعملية الاحصاء لا تتعلق بتحديد من يحتاج للدعم ومن لا يحتاجه، لكن فقط مرتبطة بمعرفة وضعية السكان والسكنى من خلال معطيات هامة مثل توفير الماء والنقل وغيرها.

وتابع :”غانمشيو عند الاسر غايتفحو الباب غانقولو ليهم لي كاين”، مضيفا “؛ليس هناك سؤال واحد في الاستمارة ديال الاحصاء لي مبنية على شي حاجة ياخدوها ولا تزول”.

مثلا “سؤال: شحال عندك ديال بيوت. ولكن شنو عندك فالبيوت لا و متنخرجوش معطى الغنى ولا فقير. كنخرجو فقط خا شحال سكان وفين كيسكنو”. وفق الحليمي

واضاف :”كنسولو على المسافة بين السكن ومقر العمل. ماشي نعرف واش عندو طوموبيل ولا لا. خصني نعرف مشاكل التنقل ..مكنسولوش على واش عندك فلوس ولا لا”، مشددا بلي “كولشي كيمشي مرقمن ومشفر. من الباحث مباشرة الى المركز لي فيه تقنيين.. مكنطلبوش حتى كارط ناسيونال “.

للي كيهم فالاحصاء، هو نعرفو وضعية النقل والصحة والمشاكل لي كتعاني مع قطاعي النظافة ونعرفو البنيات الاجتماعية من الناحية التكوين والتعليم والقدرة على ولوج الخدمات.

واكد لحليمي بلي الاحصاء جاء باش يكشف المستور، يكشف فين وصلت الخدمات والبرامج التنموية، وبلي هاد الاحصاء مسؤولية الجميع خاص كولشي يشارك.

وتابع “واللي بغا يخرج من المجموعة الوطنية ويرفض الاحصاء، يتحمل مسؤوليتو، هذا احصاء ليس للفقراء هذا احصاء للمغاربة كاملين”.