كود هناء ابو علي الرباط ///

علمت “كود” ان الحكومة صارمة فالتعامل مع كل تهديد من شي باطرون فشي مؤسسة اعلامية. هاد الصرامة جات بعد تهديد مبطن فيه ابتزاز دارو نادر مولوي رئيس “ايكو ميديا” اللي كتنشر “الصباح” و”ليكونومسيت”. حسب مصادر موثوقة ل”كود” فرجل الاعمال اللبناني عيط يسول على اداء صالير الصحافيين اللي كترسلو الحكومة =كدعم= هادي كثر من 6 سنين، اي من كورونا. وقال مولوي، حسب مصادر “كود”، باللي ايلى وقفو صاليرات الصحافيين والصحافيات ف”ايكو ميديا” غادي يكون صعيب تستامر المؤسسة.

حسب مصدر ل”كود” راه الدولة صارمة فهاد النقطة وما تقبلش الابتزاز، واضاف مصدر “كود” باللي طرد اي صحافي او المس بحقوقو او محاولة اعلان افلاس شي مؤسسة غادي تقابلو صرامة كبيرة “تم اخبارو باللي الدولة غادية تحاسب وبالقانون. ما يمكنش التلاعب بحياة عشرات الصحافيين والصحافيات من قبل اية مقاولة” يشدد مصدر “كود”. يعني مراقبة حسابات الشركة وحسابات شركاتو من نهار دخل اول درهم للدعم لهاد المؤسسة او اي مؤسسة مشات فهاد الاتجاه. حيث الدعم موجه لحماية حقوق الصحافيين والصحافيات والعاملين فالاعلام باش تبقى مستمرة هاد المقاولات

دابا الرسالة وصلات، غير شهادات لصحافيين من جريدة “ليكونومسيت” اكدات باللي المؤسسة بدات اجراءات داخلة فالتضييق، منها البوانتاج “واش صحافي او صحافية خاصو لبوانتاج وكل واحد جا معطل بساعة او جوج كيحيدوها ليه من الصالير. بعض المرات كتكون تغطية ربورطاج او حوار خارج المؤسسة، كياخذ ساعات طوال ومن بعد الصحافي كيمشي لدارو ويكمل الخدمة، حنا ما كنتحاسبوش ولكن بهاد الطريقة اللي بداتها ادارة مولوي راه فيها تضييق على الصحافيين”. اللي تكلمات معاهم “كود” اكدو باللي غاديين يعرضو حالاتهم على المجلس الوطني للصحافة فحالة اقتطعات المؤسسة لفلوس من صاليرهم فاخر الشهر.