كود- وكالات//
الحكومة د البانيا طلع ليها الدم من القمار و الياناصيب على الرياضة و الماتشات د الكرة و بغات تمنعهم نهائيا من هنا ل 2019.
اللي وقع ان البانيا فيها هاد القمار بزاف منتشر بين كل افراد المجتمع و المافيا و العصابات تتدخل فيه وكتنظم قمارها الخاص او كتفرض نتائج اللي بغات على الفرق الرياضية.
رئيس الوزراء ايدي راما قال : من يناير الجاي صافي غادي نسدو كاع نقط البيع اللي كثيرة بزاف وماعندها تا فايدة اقتصاديا و غادي نمنع هاد الرهان على الماتشات و غادي تكون عقوبات على اللي مزال كاينظم هادشي ”
البانيا من افقر الدول الاروبية و فيها اقل من 3 مليون د البشر صافي اغلبهم مسلمين ولكن عندهم 4200 مكتب د بيع الرهان الرياضي و كتجني منو الدولة 56 مليون يورو د الضرايب و الالبانيين كايخسرو 150 مليون يورو عليها ولكن ف السوق السوداء كايتداول تقريبا 400 مليون يورو اي 5 بالمائة من الناتج الداخلي الخام د هاد البلد. وكتعتبر المافيا الالبانية من اقوى المافيات ف الوحشية و التنظيم.
المهم الحكومة ماعجبهاش النتايج الاجتماعية ديال هادشي و الضرر ديالو على المجتمع و على الاقتصاد.
