كود مراكش//

علمت “كود” ان الحفل اللي دار ميستر گيمس الجمعة فساحة جامع لفنا كان مقود فيه بزاف ديال التخرميز والتخربيق. الشركة المنظمة، اللي واقف موراها واحد الزماكري سميتو نوفل، ما كا تعرف تدير تا شي حاجة.

واكدت مصادر ل”كود” ان نوفل كايدير كلشي بوحدو باش يشيط الفلوس، وما كا تصدق ليه تا حاجة، وتا واحد ما فاهم كيفاش كا يتيق فيه نجم بحال ميتر گيمس والماناجير ديالو مفروض فيهم يكونو حريصين على السمعة ديال الرابور، صاحب الملك، اللي عطا الرعاية ديالو لهاد الحفل.

واضافت ذات المصادر ل”كود” ان الفنانين اللي شاركو فالحفل كانو كاعيين بزاف بسباب الفوضى. وعلى راسهم آش كاين، مجموعة الراب المكناسية اللي ما لقاوش لوطيل فين يگلسو واخا مشاركين فالسهرة، وسعيدة شرف اللي ما لقاتش الطوموبيل اللي توصلها للحفلة.

أما السيكورتي فحسب مصادرنا، كانت منعدمة تماما فهاد الحفلة اللي تدارت غير بالبركة وبفلوس السبونسور اللي كا يدعم هاد السهرة للعام الثاني رغم انعدام المهنية ديال الشركة اللي نظماتها.