كود سبور//

كيواصلو حسنية أكادير الغرق مع الرئيس الحالي أمين الضور والمكتب ديالو وخسرو ماتش رابع فالبطولة الاحترافية هذا الموسم من أصل 6 الماتشات لعبوهم، بهزيمة اليوم الجمعة مع شباب المحمدية ضمن الدور 6.

وسالا الماتش بين حسنية أكادير والمضيف ديالو شباب المحمدية بنتيجة 3 لواحد لمصلحة ولاد فضالة، واخا كانوا السوسيين هما الاولين اللي ماركاو بواسطة عبد الله بوخنفر فالدقيقة 35، وبعدها تفركعو المحمدية وضربو 3 الاهداف متابعين بواسطة كل من اسماعيل محارب فالدقيقة 45، وكريم الكروش فالدقيقة 52، وإسماعيل بنقطيب فالدقيقة 81.

الرباح ديال شباب المحمدية خلا الفريق يطلع لوسط الترتيب ولو غير مؤقتا وكيحتل المركز 9 برصيد 7 النقاط، وبالمقابل كحتلو حسنية أكادير المراكز الأخيرة وبالضبط المركز 14 برصيد 2 نقاط جمعهم من 2 تعادلات وخاسر 4 الماتشات.