الرئيسية > آش واقع > الحركة حابسة والفوضى فطريق تيزي ن تيشكا هذ الصباح.. الطريق تسدات بسباب القرار الجديد والناس حصلو – تصاور
27/07/2020 10:00 آش واقع

الحركة حابسة والفوضى فطريق تيزي ن تيشكا هذ الصباح.. الطريق تسدات بسباب القرار الجديد والناس حصلو – تصاور

الحركة حابسة والفوضى فطريق تيزي ن تيشكا هذ الصباح.. الطريق تسدات بسباب القرار الجديد والناس حصلو – تصاور

عفراء علوي محمدي- كود//

الطريق بين مراكش وتيزي ن تيشكا كتعرف بلوكاج وفوضى كبيرة هذ الصباح، أكثر من 12 كيلومتر ديال الطوموبيلات حاصلين فالطريق اللي تقطعات من الطناش دالليل، بسبب القرار الجديد اللي كيمنع التنقل من وفي اتجاه مجموعة من المدن، ومن ضمنها مراكش.

الناس حاصلين وبايتين فطوموبيلاتهم، وكاين حتى اللي مسافرين فالكيران، كلشي كيغوت ويحتج ويطالب بالحل، حيت حتى دوميتور فهذ الزحام صعيب، الكلاكسونات ماحبساتش، والجادارمية اللي حبسو الطريق مادارو معاهم والو.



هذ القرار جا على غفلة، وبمجرد ما المسافرين سمعو بيه قررو يديرو “الهروب الكبير”، ويلحقو يمشيو عند عائلاتهم قبل 12، باش يدوزو معاهم العيد اللي غيكون نهار الجمعة، لبارح جميع الطرقات فالخرجات والدخلات ديال المدن الكبيرة كانت عامرة لبارح بالليل، وخصوصا فطريق كازا فاتجاه برشيد، وكلشي كان كايتسابق باش يفوت 12 دالليل، لكن بزاف مالحقوش وحصلو.

ولبارح اتخدات الداخلية قرار على غفلة بمنع التنقل من أو في اتجاه مدن طنجة، تطوان، فاس، مكناس، الدار البيضاء، برشيد، سطات ومراكش، بحكم أن هذ المدن شهدات ارتفاع بفيروس كورونا المستجد، وهذ القرار جا “في سياق تعزيز الإجراءات المتخذة للحد من انتشار هذا الوباء”.

 

موضوعات أخرى