كود كازا ///

البارح كان تقديم لشركة الخطوط الملكية المغربية لاستراتيجيتها بعد توقيعها للعقد البرنامج مع الحكومة قبل اسابيع. كلشي توجد باش يكون حفل كبير٬ لكن الحرب فغزة واللي كل نهار ترتافع فيه حصيلة القتلى الفلسطينيين فهاد المدينة٬ لتتجاوز اليوم 5 الاف فيهم كثر من 800 طفل. حرب بدات بعد هجوم مباغث ل”حماس” على اسرائىل واللي خلف لحد الان 1400 قتيل واكثر من 200 اسير.

هاد الاحداث الدامية خلات الخطوط الملكية المغربية تغير من طبيعة برنامجها للقاء اللي دار البارح الاثنين 23 اكتوبر 2023 فالكونكار ديالها بمقر الشركة فكازا. حسب مصادر ل”كود” تحيد كل الاشكال الغنائية اي النشاط واللي يرافقو.

“لارام” قبل 24 ساعة كانت واجهات مشكلة اخرى. الرياح القوية والعاصفة الرملية خسرات الشابيطو لكبير اللي دار فالكونگار٬ ولكن ناس الشركة خدمو من الساعات الاولى ديال صباح البارح حتى رجعو كلشي كيف كان.

المدير العام البارح تكلم علي استراتيجية الشركة من اليوم حتى 2037 بخصور عدد كبير من رجال الاعمال والمسؤولين والمنتخبين ومدراء مؤسسات عمومية وخاصة…

المهم دار عرض فاللخر وشربو الضيوف اتاي والعاصير وكلاو شي مالح وشي حلو ومشاو فحالهم.