كود سبور//

تحولت الحرب الإيرانية مع الميريكان وإسرائيل، من التشيار بالصوارخ والدرونات للكلاشات فالكورة قبل كأس العالم 2026، اللي غادي يكون الصيف الجاي فالميريكان وكندا والمكسيك ومؤهلين له ايران.

وخرج الاتحاد الإيراني يرد على الرئيس الميريكاني دونالد ترامب اللي قال على X إن المنتخب الإيراني مرحب به فالميريكان باش يشارك فكاس العالم، ولكن مزيان لهم ما يجيوش على قبل سلامتهم، وهي إشارة لانتقام النظام الايراني منهم فحالة عبروا على رأيهم بخصوص الأوضاع فبلادهم وهما مشاركين فالمونديال، كيفما وقع لمنتخب العيالات الايراني اللي هربو منو 5 اللاعبات فأستراليا خلال تواجدهم تما وبغاو يديرو اللجوء خوفا من انتقام النظام الايراني، حيث رفضو يغنيو النشيد الإيراني احتجاجا على الأوضاع فبلادهم.

ونشر الاتحاد الايراني بلاغ رد فيه على دونالد ترامب، وقال: “كأس العالم حدث تاريخي ودولي، المسؤول على التنظيم ديالو هي الفيفا وماشي شي شخص ولا شي دولة، والمنتخب الإيراني من المنتخبات اللولين اللي تأهلو للمونديال، بالقوة ديالو وسلسلة الرباحات الحاسمة اللي حققوها أبناء إيران الشجعان”.

وكمل الاتحاد الإيراني: “وبالتأكيد راه ما كاينش اللي يقدر يحيد المنتخب الإيراني من كاس العالم، الدولة الوحيد اللي ممكن تحيد من البطولة هي هاديك اللي لقبها “المضيف” (زعما الميريكان)، وهي اللي ما قدراش على توفير الامن للمنتخبات المشاركة فهاد الحدث العالمي”.