كود – سبتة //

حكمات المحكمة فسبتة، اليوم السبت، على شاب مغربي فالعشرينات من العمر بالحبس 16 شهر، مع  قرار بطردو من التراب الإسباني لمدة 5 سنين، بعدما دخل لبيت ديال واحد السيدة وهي ناعسة ففراشها, قبل ماتلقاه مشتح حداها بكرصونو.

الشاب كان وصل لسبتة مع الدخول الجماعي ديال 30 يوليوز، وتشد نهار الجمعة من طرف الگواردية ، بعدما عيطات لهم عائلة المرأة كيف ما شارت گود فمقال سابق .

وحسب المعطيات لي شارت ال موندو، الشاب كان عندو سوابق قضائية، من بينها ملفات مرتبطة ب3 اعتداءات جنسية، عاد  قضايا أخرى كتعلق بالاغتصاب والسرقة بالعنف و التهديد والضرب والجرح ،كما سبق لقضاء فمدينة فالنسيا دار فحقو قرار بالطرد الإداري من إسبانيا,العائلة وضحات حتى أن الشاب كان أصلاً ممنوع من دخول إسبانيا لمدة 10 سنين,

وفالمحاكمة ، اعترف الشاب بالوقائع وقبل بالحكم. وكانت النيابة العامة طالبات فالأول بعقوبة عامين ديال الحبس، لكن الاعتراف والتوصل لاتفاق قضائي خلى العقوبة تنقص للثلث، وتحكم عليه بـ16 شهر نافدة بسبب جريمة دخول مسكن الغير.

وبالإضافة للحبس والطرد، المحكمة قررات حتى منعة من الاقتراب من الضحية لمدة 3 سنين و4 شهور ،الحكم نص حتى على أنه إلا رجع لإسبانيا  فمدة المنع، يقدر يواجه عقوبة حبسية توصل لعامين.