كود-رويتز//

كتبات جريدة رويتز باللي 19 الفلوكة، فيهم 360 حراݣ، وصلو لجزر البليار فـاليومين لي فاتُو، وهادشي كيأكد التقبة لي تختارقات و لي كتحاول السلطات باش تحبس أسرع طريق ديال الهجرة اللي كتكبر فالاتحاد الأوروبي.

وحسب البيانات ديال وكالة حماية الحدود الأوروبية فرونتكس، عدد الناس اللي وصلو من الطريق الغربي فالبحر المتوسط— بالخصوص الفلوكات اللي كتمشي من الجزائر لإسبانيا—طلع بـ27 فالمية ما بين يناير وأكتوبر، مقارنةً مع نفس الفترة من العام اللي فات. وهاد الارتفاع هو الأكبر فهذ الطريق، حتى مع تراجع المجموع العام ديال الوافدين على الاتحاد الأوروبي بـ22 فالمية.

قال كريس بوروفسكي، الناطق الرسمي باسم فرونتكس، حسب نفس الجريدة، باللي المهربين حوّلو عملياتهم من المغرب للجزائر، حيت كيشوفو بلي مكاينش تزيار تما، اولاو كيستعملو الفلوكات السراع بحال الفانتوم، هادشي لي خلا جزر البليار هي الوجهة الرئيسية ديالهم، اليوم ولاو اللي كيخرجو من دزاير كيمثّلو 75 فالمية من طريق غرب البحر المتوسط، مقارنة مع المغرب قبل عام لي كانت كتخرج منو غير 40 فالمية.
.
هاد الوضع تزاد بعد الأزمة بين إسبانيا والجزائر من 2022، ملي مدريد كعات على الجزائر حيث وقفات مع المغرب فملف الصحرا.