عثمان الشرقي – كود//

حسب صحيفة “إل فارو” الإسبانية، وقع حدث غير مسبوق فسبتة المحتلة، مني شاب من إفريقيا جنوب الصحراء قدر يدخل لسبتة جاي من المغرب بمظلة شراعية. هاد العملية كانت أول عبور من هاد النوع اللي كتسجلو تسجلو السلطات الإسبانية، واللي وصفتها المصادر الأمنية بأنها مغامرة خطيرة وماشي مألوفة.

الشاب، اللي عندو شي عشرين عام، قرر نهار الجمعة اللي فات يطير يهز المظلة الشراعية ديالو ويديرخ مغامرة كتبان بحال شي فيلم وقدر يوصل للمدينة المحتلة بلا ما يتقاس حيث عندو خبرة ومعرفة كبيرة بكيفاش يطير ببراشيد.

حسب نفس الصحيفة، هاد الشاب هو أول مهاجر يدخل سبتة بالمظلة الشراعية، ولكن فمليلية المحتلة تسجلو غير جوج حالات مشابهة فالسنوات اللي فاتت.مصدر فالحرس المدني الإسباني قال إن السلطات ما كيضنش بزاف الناس غادي يجربو هاد النوع من العبور، حيت الوسيلة خطيرة وغالية الثمن، وكيتطلب تدريب على الطيران الشاب ملي وصل لمنطقة سيدي إبراهيم فسبتة، خلا المظلة ديالو تما وخا الدوريات الكثيرة اللي دارها الحرس المدني ، مازال ما طاحوش عليه. المعطيات كتقول انه قدر يفلت من المراقبة المغربية وتجاوز السياج الحدودي ومن بعد كمل الرحلة الجوية حتى وصل للمدينة المحتلة.

الصحيفة ذكرت كذلك أن مركز استقبال المهاجرين فسبتة (CETI) كيتسع حاليا لمئات المهاجرين اللي جاو بطرق مختلفة، أغلبهم من إفريقيا جنوب الصحراء. وكاتشير التقارير الأمنية أن أغلبهم قدروا يتجاوزو السياج الحدودي رغم الإجراءات المشددة اللي داراتها وزارة الداخلية الإسبانية، اللي ما بقاتش قادرة توقف عمليات التسلل اليومية.

الصحيفة الإسبانية سجلات أن 2025 عرف طرق غريبة للهجرة، وآخرها هاد العبور بالمظلة الشراعية. ورغم أن الحرس المدني كيتجنب الحديث على طرق جديدة للهجرة، سبق كدلك لجريدة ” ݣود” فروبورتاج صرح ليها واحد من الحراݣة أن البراشيد من الطرق لي كيستعملوها فالحريݣ الى سبتة و مليلية.