عمـر المزيـن – كود//

[email protected]

الحرارة رجعات شوية لبلادنا فالوقت اللي كولشي كيتسنا الشتا تصب. الحسين يوعابد، المسؤول عن التواصل بالمديرية العامة للأرصاد الجوية، كشف لـ”كود” باللي هاد الارتفاع سبابو هو شي “تيار جنوبي” ساهم فصعود كتل هوائية مدارية دافئة.

هاد الكتل، حسب يوعابد، خلات الحرارة تطلع خاصة فالمناطق الساحلية اللي وصلات فيها الحرارة بحال تارودانت 32 درجة، فيما وصلات بالمحمدية وأكادير وحتى النواصر 31 درجة.

دبا التوقعات بالنسبة لليوم الاثنين، كيف كشف يوعابد لـ”كود”، غادي يبقى الطقس شويا دافئ فالسهول الشمالية وحتى الوسطى والجنوبية وشمال شرق بلادنا.

وكشف المسؤول على التواصل فالأرصاد الجوية لـ”كود” أن درجات الحرارة العليا غادي تهبط تدريجيا ابتداء من يوم غد الثلاثاء، مع احتمال أن تهم بلادنا مجموعة من السحب والتي من المحتمل أن تعطي بعض الأمطار المتفرقة بشمال البلاد.