كود ـ سبور//

قرر إسماعيل الحداد لاعب الوداد الرياضي يدير حد المسار ديالو مع الفريق الأحمر، واعتذر للجماهير الودادية على الموسم الكارثي والصعيب اللي دازو منو الفريق.

وعلن إسماعيل الحداد نهاية القصة ديالو مع الوداد، وقال فأنستغرام ديالو قبل لحظات من اليوم الثلاثاء: “لكل بداية نهاية.. هاد الموسم كان هو الأخير ليا مع الوداد.. رجعت للفريق في ظروف صعبة، وكان الأمل ديالي كبير نقدم كل ما في جهدي باش نساعد الفريق ديالي، لكن للأسف عشنا موسم استثنائي وصعيب بزاف میمکنش ندخل في التفاصيل”.

وكمل الحداد: “أولا كنعتاذر للجمهور الودادي العريض، أنا أول واحد من يتحمل المسؤولية لأننا ما فرحناهومش هاد العام، كيفما تعود على الوداد في العشر سنين الأخيرة.. . كنبغي نودع العائلة الودادية، لأن هذا موسمي الأخير مع هاد النادي العظيم، ومن اليوم غادي نكون مشجع للنادي، كيفما كنت دائما”.

وزاد الحداد: “قوة الوداد في الاتحاد ديالو، وفي التلاحم في الظروف الصعبة قبل المزيانة، وبتظافر الجهود ديال كل المكونات غادا ترجع الوداد قوية ومخيفة في الداخل كيما في الخارج. باش نلعب للوداد هذا كان حلم والحمد لله تحقق ليا، وباش نفوز مع النادي ديالي بالألقاب وبالبطولات وبعصبة الأبطال، هذا كان الحلم الأكبر وتحقق والحمد لله”.

ووجه إسماعيل الحداد الشكر لكل من عاونو باش لعب فالوداد وعلى راسهم الرئيس السابق للنادي سعيد الناصيري، المعتقل ودعا معاه بالإفراج وقال: “شكرا لكل اللاعبين اللي لعبت معاهم، لكل المدربين اللي دربوني، وساعدوني في المشوار ديالي شكرا للطاقم الطبي على الاحترافية والاحترام شكرا لكل المسيرين وفي مقدمتهم الأب الروحي سعيد الناصري الله يفك سراحو.. شكرا لجمهور الوداد الكبير، أحسن جمهور في العالم، على الدعم وعلى الحب ديالكم.. شكرا للوينيرز الدرع الحصين للوداد واللي مازال الصدى ديال التشجيع ديالهم وصوتهم المرعب في المدرجات كيتردد. ديما ديما وداد”.