كود -وكالات //

السعودية داخلة على موسم الحج ديال 2027 بتصنيف جديد لبلايص الإقامة ديال الحجاج، هاد التصنيف كيخلّي الواحد يحس بحالا كاين حج اقتصادي، حج ـVIP وحج Premium.

وزارة السياحة السعودية جددات المعايير ديال مرافق إيواء الحجاج فمكة والمدينة، وقسماتها لجوج مستويات رئيسية: الدرجة الاقتصادية والدرجة الأولى ،والفرق بيناتهم غادي يكون فمستوى التجهيزات والخدمات، من شومبرات والمرافق  و للاستقبال والنظافة والصيانة والخدمات

يعني، ماشي مناسك الحج اللي تبدلات وولات فيها درجات، ولكن الإقامة والخدمات اللي كترافق الحاج هي اللي غادي يكون فيها التصنيف. والحاج اللي يختار عرض اقتصادي غادي يكون فمستوى معين من الخدمات، اما عرض الدرجة الأولى غادي يكون موجه لإقامة بمستوى عالي ،وبالمنطق ديال الفنادق، يمكن بسهولة تلقى راسك قدام مفهوم “حج Premium” أو “حج VIP”.

المراقبة غادي تبدا قبل الترخيص، و قبل استقبال الحجاج، وغادي تبقا حتى فيامات الحج، باش تتأكد السلطات من السلامة والنظافة والصيانة واستمرارية الخدمات.

السعودية كتقول بلي الهدف هو تحسين جودة الاستقبال وضمان سلامة الحجاج وجاهزية أماكن الإقامة، ولكن بالنسبة لعدد من المنتقدين، استعمال منطق “اقتصادي” فإقامة مرتبطة بفريضة دينية كيخلي السؤال يتطرح على اشمن لوجيك كيخلي  تحول تجربة دينية لمنتوج سياحي ؟