كود ـ مراكش//

صدرات المحكمة ديال الجنايات الابتدائية فمراكش، نهار الجمعة 7 نونبر، أحكامها فواحد من الملفات اللي دارت البوز فالساحة التعليمية، واللي كيتعلق باختلاس وتبديد فلوس عمومية فصفقات ديال وزارة التعليم.

القضية فيها تسعة ديال المتهمين، من ضمنهم مسؤولين كبار خدمو قبل فوزارة التربية الوطنية، وتهمتهم جاية من اختلالات طاحت عليها المفتشية العامة فالوزارة، فصفقات وسندات طلب فيها بزاف ديال الشبهات، خصوصا اللي كيتعلقو بمواد التنظيف.

المحكمة برّآت المدير السابق ديال الأكاديمية الجهوية فمراكش آسفي من جميع التهم، ولكن حكمات على المدير الإقليمي السابق، وعلى “عبد الواحد.م” اللي كان مكلف بتسيير الأكاديمية ما بين 2014 و2016، ومعاهم مقاولة، بعامين ديال الحبس النافذ وغرامة ديال 50 ألف درهم لكل واحد.

وزادت المحكمة حكمات على ثلاثة آخرين بعامين، منها عام نافذ وعام موقوف التنفيذ، وغرامة ديال 30 ألف درهم لكل واحد، فحين حكمات على جوج آخرين بالحبس الموقوف التنفيذ لعامين وغرامة ديال 20 ألف درهم.

وفالشق المدني، المحكمة أمرات المدانين يخلصو 150 ألف درهم للأكاديمية الجهوية فمراكش آسفي، كتعويض، ويتقاسمو الصائر بالتضامن بينهم.

المتهمين كانو متابعين في حالة سراح، بتهم ديال “اختلاس وتبديد أموال عمومية، والتزوير فمحررات رسمية واستعمالها”، ومعاهم اللي شارك فهاد الأفعال.