وكالات//

محكمة أكسفورد حكمات على سالي سميثسون، اللي عندها 61 عام، بالحبس، من بعد ما تّدانت بمنع دفن جثة الشريك ديالها جون بلاكويل بطريقة قانونية.

وصرّح المدّعي العام تشارلز وارد جاكسون، حسب جريدة Mirror، بأن جثة بلاكويل اللي كان عندو 71 عام كانت فمرحلة متقدمة ديال التحلّل ملي لقاوها فغرفة النوم، وبيّن أن سبب الوفاة المشكوك فيه هو نوبة قلبية، حيث كان المتوفّى كيعاني من مشاكل مزمنة فالقلب.

وقالت المحكمة باللي العلاقة بين سميثسون وبلاكويل كانت عامرة بالمشاكل، وكانو كيتخاصمو بزاف تحت تأثير الخمر، وكان حتى عنف أسري، وزادت أوضحات باللي عند سميثسون سوابق جنائية فالعنف تجاهو.

وزاد المدّعي العام وقال باللي سميثسون بقات كترقد حدّا جثة الشريك ديالها لمدة 3 أسابيع، وكتحاول تخبّي الواقعة، حيث كانت كتسيفط مساجات من التليفون ديالو من بعد ما مات، وكتقول للناس باللي “خرج” ولا “راه كيتشافى من زيارة للسبيطار‘‘.