كود- اميوزار كندر//

حكمات غرفة الجنح التلبسية بالمحكمة الابتدائية بصفرو، عشية اليوم الأربعاء، بالحبس النافذ والخطية فحق مغني الراب جواد أسراضي، المعروف فنياً بـ«بوز فلو»، على قبل شكاية دارتها به طليقتو.

وحكمات المحكمة على «بوز فلو» بعام ديال الحبس النافذ، وخطية مالية ديال 5 آلاف درهم، زيد عليها 50 ألف درهم خاصو يخلصها لطليقتو كتعويض فإطار المطالب المدنية.

وفالمقابل، برأت المحكمة الرابور من تهمة «التهديد ضد الطليق»، وتم إشعارو بحقو فالاستئناف فأجل 10 أيام.

وكان البوليس فمدينة إيموزار كندر شدّ جواد أسراضي، المعروف بلقب «بوز فلو»، نهار الاثنين 10 غشت الجاري، من بعد شكاية تقدمت بها طليقتو، كتتهمو فيها بالسب والقذف والتشهير، بسبب كلمات أغنية «Cent Daz»، اللي هضر فيها على تفاصيل العلاقة ديالو مع الزوجة السابقة.

النيابة العامة كانت تابعات «بوز فلو» بعدة تهم، من بينها نشر وتوزيع ادعاءات ووقائع كاذبة بهدف المس بالحياة الخاصة ديال الأشخاص والتشهير بهم من طرف الطليق، عاد السب العلني والقذف ضد امرأة بسبب جنسها، زيد عليها تهمة التهديد الموجه ضد الطليق.