كود -وكالات //

فالسنين الأخيرة بانو فالشينوا معسكرات نقص الوزن بطريقة شبه عسكرية لدرجة شي ناس سموهم ’’حبس الجوع”.

هاد البلايص، اللي كيوصلو لحتى ألف معسكر فالصين، كيديرو برامج قاصحين باش الواحد ينقص فالوزن دغيا، بثمن واصل لـ 600 دولار فالشهر.

هاد المعسكرات خدامة بنظام يومي كيبداو بقياس الوزن مع الصباح، ومن بعد كاين برنامج سبور تقيل كيدوم ساعات، فيه تمارين قاصحين، تمارين ديال القوة حتى الماكلة مراقبة مزيان وممنوع تاكل بين الوجبات ولا دخل معك شي ماكلة من برا، وممنوع تخرج من المعسكر إلا لظروف خاصة جدا مدام ماسالاش البروغرام.

وخا أن بزاف ديال الناس بانت عندهم نتائج سريعة مني نقصو عدد من الكيلوات دغيا، ولكن خبراء فالصحة كينبهو من المخاطر ديال هاد الطريقة، حيت نقص الوزن دغيا يقدر يضر العضلات، ويخلق مشاكل نفسية، وزيد عليها أن بزاف كيرجع ليهم الوزن منين كيساليو البرنامج.

وكيشوفو المختصين أن السبب فانتشار هاد المعسكرات هو الضغط الاجتماعي على الشكل ديال الجسم، وزيد عليها تأثير السوشيال ميديا اللي كتشهر بهاد التجارب.