كود كازا//

فإطار المجهودات اللي كيديرها المغرب باش يشجع الشباب يدخلوا عالم السياسة ويشاركو فصناعة القرار، كشفت وزارة الداخلية على قرار جديد كيدعم الشباب اللي غادي يترشحو فالانتخابات المقبلة. القرار كينص على تخصيص 35 مليون سنتيم لكل مرشح شاب، فمحاولة باش يتخفّفو عليهم مصاريف الحملة الانتخابية ويزيدو فرصهم فالمنافسة.

هاد الخطوة جات مورا النقاش الكبير اللي كاين فالساحة السياسية على ضعف المشاركة ديال الشباب، خصوصاً أن بزاف منهم كيحسو بالإقصاء أو ما كيعرفوش كيفاش يوصلو أصواتهم داخل المؤسسات المنتخبة. الوزارة كتقول باللي الهدف هو “ضخ دماء جديدة فالأحزاب والمؤسسات المنتخبة”، وتشجيع الكفاءات الشابة باش تكون عندها الجرأة تدخل الميدان السياسي وتبدّل الصورة النمطية القديمة.

المبلغ غادي يتمنح للأحزاب السياسية اللي كيقدّمو مرشحين شباب، بمعنى أن الشباب ما غاديش يتوصلو بيه مباشرة، ولكن عبر الحزب اللي مرشّحين من طرفو. الهدف هو أن الدعم يتصرف بطريقة منظمة وشفافة، ويساعد فالحملة الانتخابية ماشي فمصالح شخصية.

الداخلية ما نساتش حتى الشباب اللي باغين يترشحو بلا تزكية حزبية، بحيث مشروع القانون الجديد كيأكد باللي حتى المرشحين المستقلين اللي عمرهم أقل من 35 عام غادي يكون عندهم الحق يستافدو من نفس الدعم المالي اللي مخصص للشباب الحزبيين ،المستقلين غادي يكونو مطالبين فقط بجمع عدد معيّن من التوقيعات باش يثبتو الجدية ديال ترشحهم، وهاد الشي غادي يعطيهم شرعية قانونية باش يستافدو من الدعم العمومي اللي كيقدر يغطي حتى 75 فالمية من مصاريف الحملة الانتخابية.

هاد القرار تْعتبر من طرف بزاف ديال المتتبعين خطوة جريئة، حيث غادي توسّع قاعدة المشاركة السياسية، وتخلق توازن جديد بين الشباب الحزبي والمستقل، وكل واحد يعبّر على افكارو ومشروعُ بطريقتو.