الرئيسية > تبركيك > الحاجة الحمداوية توفات.. وولدها لـ”كود”: الخبر صحيح وكنقادو ترتيبات الوفاة
05/04/2021 08:00 تبركيك

الحاجة الحمداوية توفات.. وولدها لـ”كود”: الخبر صحيح وكنقادو ترتيبات الوفاة

الحاجة الحمداوية توفات.. وولدها لـ”كود”: الخبر صحيح وكنقادو ترتيبات الوفاة

عفراء علوي محمدي- كود//

اليوم الاثنين الصباح، توفات الحاجة الحمداوية، عن عمر 91 عام.

وفاتصال “كود” مع الابن ديالها، أكد فتصريح مقتضب خبر وفاة الوالدة ديالو، لكنه اعتذر عن الحديث على التفاصيل “حنا مشغولين دابا بالترتيبات…”

وكانت الحاجة الحمداوية دخلات للإنعاش فسبيطلر الشيخ زايد فالرباط، بعدما كانت كَالسة فيه ازيد من شهرين باش تخضع للمراقبة الطبية.

وكانت كشفات خديجة سخير، أم كَزينة عويطة، الفنانة والصديقة المقربة من الحاجة الحمداوية، أن وضع هذ الأخيرة كان صعب لكن من بعد صبح مستقر، وأنها كانت كتقدر تتجاوب معاهم عبر النافذة الزجاجية والهاتف الموضوع جنب النافذة، وكتقدر تحرك الرأس ديالها.

وزادت سخير، فتصريح سابق ليها ل”كود”، كتقول: “تخلعنا على الحاجة بزاف، حتى خبرونا الأطباء لبارح مع نص الليل أنها لا قدر الله غادي تموت”.

وكانت أكدات سخير انها مريضة بفقر دم، واخا مصادر إعلامية كتقول أن الحمداوية كان فيها سرطان الدم، ووفاتها كانت بسبابو.

وآخر خرجة فنية كانت للحمداوية كانت خلال الاحتفال رأس السنة اللي فات، بحيث غنات مع الفنانة المغربية اليهودية ريموند البيضاوية.

وكان سبق للحمداوية عطات موروثها للمغنية الشابة گزينة عويطة وعلنات اعتزالها، كيف عطاتها الحق فالتصرف فيه، من بعد ما دارت معاها ديو غنائي على شكل فيديو كليب “حاضية لبحر”.

 

 

موضوعات أخرى