كود الرباط//

والي بنك المغرب، عبد اللطيف الجواهري، تلفو دونالد ترامب، الرئيس الامريكي، وقال بلي معه “كيتقلبو ايات النهار ويوليو ايات الليل، والعكس”.

والي بنك المغرب، فالندوة ديال بنك المغرب، قال بلي هادشي ديال الرسوم الجمركية لي فرض ترامب على المغرب مزال متفكش، موضحا :”بلي ترامب كيناقش مع كل دولة دولة.. وحنا مزال موصلش لينا ومعرفناش شنو يدير”.

وتابع الجواهري :”صعيب تجي وتقول شنو غايكون، وهو نفسه كيقول كلمة ويصبحو ايات الليل ايات النهار والعكس. وتأويل كلامو فشكل”.
وشدد المسؤول المالي الأول في المغرب، بلي ضروري تتبع وتحليل المعطيات وكنشوف انعكاساتها.

وبخصوص تأثير الحرب الإيرانية الإسرائيلية على التضخم ونسبة الفائدة والاسعار، قال الجواهري بلي “هادي حرب جديدة، يالله 13 يوم.. شوف غير من صباح شنو تقال وشنو تبدل، نضت بكري شفت شنو كاين . ترامب قال غادي توقف الحرب، ومع 10 فتحت لوموند ولقيت بلي اسرائيل ضربت ايران”.

وأكد الجواهري، على صعوبة التنبؤ بما سيحدث، مشيرا الى انه كاينا “حرب البلاغات والفايك نيوز، لدى عندما نشتغل، نقول بلي كاين عدم اليقين، حرب غطت حرب، كيضربو غزة كل نهار. كيف يمكن نشتغل ونتوقع”.

واضاف :”خصني معطيات فوق الطبلة ونحلل باش نعرف القرار لي هو أصوب للوضعية. كندير اجتماعات متتالية لمجلس بنك المغرب كل 3 اشهر “.