كود سبور- الجديدة//

بعد الميساجات اللي دعت من خلالهم جريدة “گود” الجمهور باش يمشي للتيران يشجع عيالات ليفار فدوري أبطال أفريقيا لكرة القدم، والرسائل اللي رسلو اللاعبات ديال الفريق من خلال تصريحات لـ “گود” فالماتشات اللي فاتو، جا الجمهور يشجعهم اليوم السبت فالفينال ديال المسابقة ضد تي بي مازيمبي الگونگولي.

الفينال بين فريق الجيش الملكي النسوي وتيبي مازيمبي الكونگولي اللي ملعوب مساء اليوم السبت فتيران العبدي بالجديدة، حاضر فيه فوزي لقجع رئيس الجامعة الملكية المغربية لكرة القدم، والجنوب أفريقي باتريس موتسيبي رئيس الاتحاد الأفريقي لكرة القدم، ووالي جهة الدار البيضاء سطات محمد امهيدية، وشخصيات رياضية مغربية وافريقية من اعلى مستوى.

هذا الفينال جا له الجمهور بشكل كبير والمدرجات عامرين بالمشجعين، اللي فيهم وحسب ما علمت “گود”، فمشجعين ديال الجيش الملكي جايين من سلا والرباط باش يشجعو الفريق العسكري وهذا الشي بالإضافة للجمهور اللي جاي لتيران العبدي من الجديدة والنواحي ديالها، وهاد المشجعين فيهم العيالات والرجال، وهذا الشي مزيان وغايخلي اللاعبات يحسو بالمساواة فالمساندة بحالهم بحال اللاعبين الرجال.