كود- كازا //
علنات وزارة الداخلية القطرية أن السلطات شدّات أكثر من 300 واحد بتهمة نشر تصاور ومعلومات على الهجمات اللي دارتها إيران على قطر.
وقالت الوزارة فبلاغ ديالها باللي تم توقيف 313 شخص حيث صوّرو ونشرو فيديوهات، ونشرو حتى معلومات قالت عليها السلطات بأنها “مضللة” وإشاعات فلوقيتة ديال الهجمات.
وقبل هاد التوقيفات، كانت وزارة الداخلية خرجات ببلاغ كتدعي فيه المواطنين والمقيمين ما يصورو حتى شي مشاهد مرتبطة بالهجمات أو بالعمليات الأمنية، وما ينشروش حتى معلومات ولا صور فمواقع التواصل الاجتماعي، بسبة الحفاظ على الأمن العام .
هاد الخطوة خلات بزاف المتابعين يسولو على كيفاش كتعتاقل قطر الناس إلى نشر صور ومعلومات، وقطر نفسها عندها قناة الجزيرة اللي معروفة بتغطيتها للأحداث فالعالم كامل وبنشرها لصور وتقارير من مناطق الحروب والأزمات، بزاف ديال المتابعين كيشوفو أن منع المواطنين من نشر المعلومات فهاد الظروف كيبان فيه نوع من التناقض، لحقاش حرية نقل الخبر خاصها تكون مبدئية وماشي الكاميرا تخدم غير فالدول الأجنبية هاد الشي خلا البعض يقول” الجمل ما كيشوفش حدبتو كيشوف غير حدبت صاحبو! “.