كود الرباط//

كشفت الجمعية المغربية لحقوق الإنسان، اليوم الجمعة، ف تقرير أولي على احتجاجات جيل زيد (GenZ)، أن المحاكم المغربية خرجات لحدود 22 أكتوبر بما لا يقل على 240 حكم بالسجن النافذ فحق معتقلين من الحركة، بعضهم تاخد عليه 15 عام ديال الحبس.

الجمعية قالت صباح اليوم الجمعى فندوة صحافية بالرباط، أن بزاف من المعتقلين تحاكمو فظروف ما فيهاش شروط المحاكمة العادلة، وأن بعض الاعتقالات كانت عشوائية، بحيث كاين ناس ماعندهوم حتى علاقة بالاحتجاجات وصدرات ف حقهم أحكام قاسية.

وحسب التقرير اللي قدماتو سعاد براهمة، رئيسة الجمعية، فالغرفة الجنائية الابتدائية ديال محكمة الاستئناف فأكادير بوحدها خرجات بـ15 عام ديال الحبس فحق 4 أشخاص، و12 عام فحق معتقل واحد، و10 سنين فحق 31 معتقل، وزادت بـ6 سنين على 3 آخرين، و5 سنين على جوج، وكلهم من القليعة وخميس آيت اعميرة وتزنيت وتارودانت.

وحسب نفس التقرير، كاين أكثر من 330 قاصر متابع قضائياً، بعد ما تم توقيف أكثر من 2100 شاب وشابة وقاصر. بزاف منهم طلقوهم، ولكن بقات المتابعة القضائية جارية على 1400 شخص، منهم قرابة 1000 فالحبس والباقي فالسراح المؤقت.

المتابعات كتوزع بين الجنحي فـالمحاكم الابتدائية، والجنائي فـمحاكم الاستئناف خصوصاً فـأكادير وسلا ومراكش، وكيْتابعو أكثر من 500 شاب فالسراح المؤقت.

وختمات الجمعية تقريرها بالتعبير على القلق والامتعاض من استمرار متابعة قاصرين بتهم جنائية، فاش بزاف منهم خداو البراءة، وكتطالب بوقف هاد الاعتقالات اللي كاتمسّ بحرية التعبير والاحتجاج السلمي.