كود سبور//

شجعت الجماهير المغربية فتيران ادرار بمدينة أكادير، المنتخب الوطني المغربي باش يربح كاس إفريقيا 2023، اللي غتنظمها الكوت ديفوار عام 2024.

واستغلت الجماهير المغربية ماتش المنتخب المغربي وليبيريا برسم اقصائيات كوب دافريك، لتحفيز الأسود والجيل ديال دابا فليكيب ناسيونال.

وهزو مشجعين المنتخب الوطني المغربي مع بداية الماتش تيفو مرسوم فيه الفيل والأدغال فإشارة إلى كوب دافريك الكوت ديفوار، وأب فالتوني ديالو رقم 76 هاز ابن فالرقم ديالو 24، زعما الجيل الحالي غيكرر فعام 2024 الكاس اللي ربحها جيل 1976.

التيفو ديال الجماهير المغربية حمل كذلك عنوان حماسي خداوه من النشيد الوطني المغربي وهو “هب فتاك لبى نداك”.