كود – وكالات //

علنات وزارة الخارجية ديال الولايات المتحدة، اليوم لاربعا ، بلي قررات توقف معالجة تأشيرات الهجرة لمواطنين ديال 75 دولة فالعالم، من بينها المغرب وزيد عليها دول عربية وإسلامية، وحتى روسيا وكوبا إدارة الرئيس دونالد ترامب برّرات هاد القرار بلي مواطنين هاد الدول كيتصنّفو ضمن الفئات اللي ممكن يعتمدوا على المساعدات الاجتماعية منين يوصلو للولايات المتحدة.

فبلاغ قالت الخارجية الأمريكية بلي إدارة ترامب قررات تحط حدّ لاستغلال نظام الهجرة الأمريكي من طرف ناس كيقلبو غير على الاستفادة من ثروات الشعب الأمريكي وزاد البلاغ وقال بلي معالجة تأشيرات الهجرة من هاد 75 دولة غادي تتوقف مؤقتاً، حتى تعاود الوزارة تراجع طرق المعالجة ديال الملفات، باش تمنع دخول أجانب ممكن يعتمدوا على الرفاه الاجتماعي والمنافع العمومية.
.
التوجيهات الجديدة وسعات لائحة الشروط اللي ممكن ترفض بسببها الطلبات، وولات حتى اللغة الإنجليزية داخلة فالتقييم، بحيث مسموح للمسؤولين يديرو المقابلات بالإنجليزية ويقيّمو مستوى المتقدم ،التوجيهات كتهم حتى الوضع المالي والمهارات، بحيث كيتشاف تعليم المتقدم، الخبرة ديالو فالخدمة، والممتلكات ديالو، وزيد عليها العمر والحالة الصحية، اللي ولات كتفحص بدقة كثر من غير الفحوصات العادية.

اللائحة اللي علنات عليها الخارجية الأمريكية فيها 75 دولة من آسيا، إفريقيا، أوروبا الشرقية، وأمريكا اللاتينية. ومن بين الدول اللي داخلة فيها: المغرب، مصر، العراق، الأردن، سوريا، اليمن، السودان، الصومال، ليبيا، تونس، الجزائر، لبنان، الكويت، أفغانستان، إيران، باكستان، وزيد عليهم روسيا، البرازيل، كولومبيا، وكوبا.