عمر المزين – كود///

خرجات إدارة الجمارك والضرائب غير المباشرة بدورية جديدة نهار 20 يناير 2026، كتهم الضريبة على القيمة المضافة عند استيراد المواد الموجّهة لتغذية الماشية وحيوانات الدواجن، وهاد الخطوة جات باش توضّح شنو هي المنتجات اللي كتستافد من النسبة المخفّضة ديال TVA وتوحّد التطبيق فالحدود.

الدورية، اللي كتحمل رقم 6711/211، جاية تكملة لدورية سابقة صدرت فـ31 دجنبر 2013، وكتندرج فإطار تطبيق المادة 121 من المدونة العامة للضرائب، اللي كتنص على اعتماد نسبة مخفّضة ديال 10 فالمائة من TVA عند استيراد بعض منتجات الأعلاف.

وحسب المعطيات اللي جات فالدورية، تمّت إضافة منتوج جديد للائحة ديال المواد اللي كتستافد من هاد النسبة المخفّضة، ويتعلّق الأمر بالحمض الدهني المقطّر (Acide gras distillé – FRAFAT F85-10)، المصنّف تحت الرمز الجمركي Ex 2915.70.00.10، واللي كيتستعمل فتعليف الماشية والدواجن.