كود- وكالات//

تحولات عطلة مسؤول فالكرة القطرية لفضيحة، بعدما شداتو السلطات الأمريكية مباشرة من بعد نزولو من سفينة سياحية جاية من المكسيك، ووجهات ليه تهم ثقيلة كتعلق بنقل مواد إباحية كتهم الاستغلال الجنسي ديال الأطفال، وإذا تثبتات هاد التهم، غا يلقى راسو قدام عقوبة كتقدر توصل لـ20 عام ديال الحبس الفيدرالي.

القضية كتعلق بعلي حمود النعيمي، لي عندو  42 عام، واللي كتقول الوثائق القضائية إنه كيخدم منظم للمباريات فالجامعة القطرية لكرة القدم، وعندو حتى مهام مرتبطة بتمثيل المنتخب القطري. ووفق الملف، دخل للولايات المتحدة جاي من قطر قبل ما يتوقف فمدينة جالفستون بولاية تكساس، مباشرة بعد نهاية رحلة بحرية انطلقت من المكسيك.

وفجلسة استماع دارت نهار 29 يوليوز، قالت النيابة الأمريكية بلي التفتيش اللي تدار لتلفونو ديالو بين على صور ومقاطع فيديو  كتوثق الاستغلال الجنسي ديال أطفال قاصرين، هاد المعطيات كانت من بين الأسباب اللي خلات النيابة تطلب استمرار اعتقالو

وزادت المحكمة اعتبارات أخرى، منها أن النعيمي يقدر دغيا يمشي لقطر، خصوصاً أن الدوحة ما عندهاش معاهدة لتسليم المطلوبين مع مريكان، الشي لي خلا  القاضي، نهار 31 يوليوز، يرفض إطلاق سراحو .

وكتقول وثائق الاتهام إن المتهم تنقل بين بينخ ولايات أمريكية وكان كيدوز عطلتو انطلاقاً من جالفستون قبل ما يخطط يرجع لقطر، كما كتشتبه السلطات أنه دخل للأراضي الأمريكية وهو هاز هاد المواد.