كود سبور//

رد الدولي الجزائري رياض محرز على وسائل الإعلام الجزائرية اللي ربطت الاسم ديالو بالانتقال للوداد الرياضي.

رياض محرز تفاعل مع الأخبار اللي نشرها الإعلام الجزائري اللي سعر وهو كاينشر خبر انتقال اللاعب الجزائري للفريق المغربي، وحط محرز واحد ايموجي 🙅🏽‍♂️ فالحساب ديالو على تطبيق “X”، وهي إشارة لان هذا الشي اللي كايروج ماشي بصح.

وكانت جرائد سعودية وقطرية ربطت اسم رياض محرز بالوداد الرياضي، قبل ما تتناقل وسائل الإعلام الجزائرية هذه الأخبار وتسعر حيث اللاعب الجزائري اللي من ام مغربية تقال انه غادي يلعب لفريق مغربي.

للإشارة فرياض محرز مول 35 عام ما عندوش فرقة بعدما سالا العقد ديالو مع اهلي جدة السعودي هذا الصيف، وكان الصالير ديالو من ليصالير اللي طالعين فالبطولة السعودية من ورا البرتغالي كريستيانو رونالدو والفرنسي كريم بنزيما، ويالمقابل فالوداد الرياضي كايحاولو ينقصو من التكاليف المادية فالفريق، وراه كايتفاوضو مع حكيم زياش على صياغة بخصوص الصالير ديالو اللي طالع بزاف.