كود سبور //

المنتخب الجزائري دخل الماتش قدّام السودان اليوم لاربعا مع ربعة ديال العشية فملعب مولاي الحسن فالرباط وجا معاه عدد كبير من المشجعين اللي باش يشجعو المنتخب دزايري قبل مايبدا الماتش، بزاف ديال دزايرية اللي جاو المغرب عاودو على الاستقبال المزيان والكرم اللي لقاوه من عند المغاربة ، السبوعا و المنتخب الجزائري لاعبين ماتشات المجموعات ديالهم كاملين فالرباط والمناصرين استغلو الفرصة باش يتلاقاو ويشاركوا لحظات الفرح والخاوة وسط وبرا التيران.

بزاف منهم صرحو لكود انهم مرتاحين وعاجبهم لحال
واحد منهم قال لكود ” المغاربة استقبلونا مزيان وتهلاو فينا حنا، فرحانين حيث جينا الرباط وبغينا نلعبو مع المغرب فلفينال“
مشجع من القبايل حتى هو قال” كنحس بحال إلا كاين فبلادي“
مشجع آخر من عنابة قال ” التنظيم شْباب وغاية والاجواء إفريقية“ واحد آخر مزوج من مغربية صرح لنا” التنظيم والاستقبال احترافي واستثنائي وكلشي واعر “

محمد من بوردو قال ” هاد الشي زوين بزاف, التنظيم مليح والاستقبال ديالنا كجزائريين كان غاية العلاقات بين المغاربة والجزائريين ديال الخوت, الصداع كاين غير فالسوشيال ميديا ولكن فالواقع ما كاين حتى فرق“، أمين من مارسيليا جا مع العائلة و قال:” هادي أول زيارة ليا للمغرب وتلقّيت استقبال زوين بزاف وزيد عليها الماكلة بنينة، الجو ما معاوناش شوية حيت كاينة الشتا ولكن التجربة غاية“

اما يوسف من وهران قال ” هادي أول مرة نزور المغرب بسبب الكان وزاد: كنت كنسمع كلام مزيان على المغاربة ولكن منين وصلت تفاجأت كتر، ستقبلوني بحال إلا كنت خوهم الواقع هنا مختلف على اللي كيتقال، الجزائر والمغرب ديما غيبقاو خوت تحية للمغرب وفيف لالجيري“

التصريحات ديال الجماهير الجزائرية أكدات أن الكان فالمغرب منضم بشكل رياضي ومافيهش حس السياسة وان دزايرية واخدين راحتهم وناشطين وكيدورو فراحة تامة بلا مايهضر معهم حد ،وان بزاف منهم كيحس بحالا فبلادو او اكتر، هادشي كيدل على أن الشعب المغربي شعب مضياف ومرحاب ومعندوش حساسية من شي حد كيف ما بغا يكون نوعو.