هناء ابو علي كازا ///

الجريمة الارهابية اللي مشى ضحيتها البوليسي هشام بوزردة وهو خدام بدات كتبان خيوطها شوية بشوية. غدا فالصباح غادية تكون ندوة صحافية فمقر “الاف بي اي” ديالنا فسلا لتقديم معطيات اكثر.

حسب ما توصلت به “كود” فهشام تقتل فروبوان بالرحمة ضواحي كازا. الشهيد كان خدام وعيى. 3 من الارهابيين كانو وجدو مخططهم وكيعرفو وقتاش يدخل للطونوبيلة ديالو باش يرتاح. وفق مصدر “كود” تقريبا شي 10 دقايق ويسالي سربيسو٬ الوضع كان عادي فالروبوان٬ دخل لطونوبيلتو. فهاد اللحظة٬ يضيف مصدر “كود”٬ تضرب بالموس لكرشو ولجنبو فين كاين لكلاوي٬ قبل ما يتم دبحو من قبل 3 دواعش.

هادو كانو مخططين لكلشي. حتى لبلاصة اللي غاديين يحرقو فيها الطونوبيلة ديالو. كانو كراو “كليو” گرونا وداوها معاهم مع طونوبيلة البوليسي.

دابا خاص الدولة تكرم هاد الشهيد. خاص الروبوان اللي وقع فيها هاد الجريمة تحمل اسم “الشهيد هشام بوزردة”. خاص تكريم وطني كبير لهاد الشرطي. الرد خاصو يكون ضد الارهاب. ضد فكر الدواعش.

الادارة العامة للامن الوطني كانت كرمات هاد الراحل. جيست مزيان من ادارتو. دابا خاص المجتمع باحزابو بجمعياتو بانديتو…. تكرم هاد الشهيد البطل. خاص تصاورو تحضر بزاف