كود الأطلس//
القضية ديال الوليد الراحل محمدينو عرفات تطور جديد من بعد الجلسة ديال التحقيق اللي دارت لبارح الخميس 16 أكتوبر 2025 فمحكمة الاستئناف فالراشيدية، مباشرة من بعد ما تخرجات الجثة من مقبرة أغبالو.
فهاد الجلسة، قاضي التحقيق سمع لـ جوج ديال الطبا و مقدم
عندهم علاقة بالقضية، و تحدد نهار 13 نونبر 2025 كموعد جديد باش يسمعو لـ جوج ديال الشهود اخرين.
وف نفس الوقت، مزال فالإنتضار نتائج التشريح الطبي اللي دارتو لجنة طبية مْكونة من ثلاثة أطباء فمستشفى ابن رشد فكازا صباح نفس النهار، والتقرير غادي يتحال مباشرة على قاضي التحقيق ملي يكون واجد.
معلوم أن جثة المرحوم رجعات لمديلت نهار الخميس فالعشية ، وتدفنات عاود تاني نهار الجمعة 17 أكتوبر 2025 بنفس الطقوس والإجراءات، وبحضور نفس الناس اللي كانو فعملية الاستخراج لي من بينهم الأم تودا لي مقدرتش تحمل الم دفن ولدها جوج خطرات الشيئ لي خلاها طيح وتهزها لومبيلونص.
