كود الجديدة//

الجديدة والكرة المغربية اليوم على وقع الحزن، بعدما وصلها خبر وفاة اللاعب الدولي السابق محمد المعروفي، واحد من أعمدة الكرة الوطنية فسبعينات القرن الماضي، وواحد من النجوم اللي صنعو البدايات ديال المجد ديال المنتخب الوطني فمونديال 1970 فالمكسيك.

المعروفي، اللي كان من الركائز الأساسية ديال الدفاع الحسني الجديدي فـ”تشكيلة الرعب”، ماشي غير لاعب بصم التاريخ ديال الفريق، بل حتى إطار وطني رجع ليه فمناسبات كثيرة باش يدربه ويعطي من تجربتو وحنكتو للأجيال الجديدة. وزيد على هاد الشي أنه كان حتى محترف فالفريق الفرنسي نيم، وخلا رصيد كروي محترم ومتميز.

الراحل كان كيعاني مع المرض فالشهور الأخيرة، وداز قرابة شهر فواحد المصحات فكازا قبل ما يفارق الحياة صباح نهار الثلاثاء 18 نونبر. وبهاد الرحيل كيطيح نجم آخر من نجوم الكرة المغربية اللي بصماتهم باقي منقوشة فذاكرة الجمهور.

محمد المعروفي حمل القميص ديال المنتخب فنهائيات كأس العالم 1970، ومثل المغرب حتى فـ”كان” 1972 بالكاميرون، وكان من الأسماء اللي رفعو الراية الوطنية عاليا فواحد الحقبة اللي كانت فيها الكرة المغربية كتكتب تاريخها الأول فالمحافل الدولية.

اليوم كتفقد الجديدة، وكتفقد الساحة الرياضية كاملة، واحد الإنسان اللي جمع بين الخلق، الانضباط، والغيرة على القميص الوطني.