كود: الجديدة//
“المدينة ماشي ملعب ديال شبيبة باغية تركب على الضوضان!”
فأقوى رد خرج من رئاسة جماعة الجديدة فهاذ الولاية، فجر جمال بنربيعة، رئيس الجماعة، بلاغ ناري وجه فيه المدفع السياسي ديالو صوب عثمان الطرمونية، رئيس جماعة أولاد فرج والمسؤول بالشبيبة الاستقلالية، بعد ما هذا الأخير حاول يعطي راسو حجم أكبر من مقامو وهاجم تسيير المدينة.
بنربيعة ما دار لا مجاملة لا لغة خشب، وسمى الأمور بسميتها:
الطرمونية كيحاول يركب بطولة من الورق، وباغي يبني اسم سياسي على ظهر مدينة ما عمرو كان جزء منها لا ترابيا ولا انتخابيا.
وقال رئيس الجماعة ان تصريحات عثمان الطرمونية مجرد “تضليل رخيص” ومحاولة باش يصنع ضوضان إعلامية، لأن الواقع كيكذب الهضرة ديالو:
“الجديدة ما كتسناش واحد جا من خارج الإقليم باش يعطيها الدروس، وعندها منتخبين خدامين بصمت وبمؤسسات، ماشي بشعارات الشبيبة والفيديوهات”.
وزاد بنبرة أكثر حدة:
“اللي كيهضر باسم حزب الاستقلال بلا صفة، وكيقدم راسو بحال الناطق الرسمي، راه كيتجاوز حدو… والحزب ماشي ملك خاص ديال حتى واحد.”
وضرب الرئيس مباشرة فالنقطة اللي كتقلق الطرمونية:
“باغي تهضر على تجديد النخب؟
بدا من دارك: الأب ديالك اللي كيمثل الإقليم فالبرلمان سنين بلا حصيلة…
والصهر ديالك اللي شدّ مفتشية الحزب وما بغا يطلقها…
عاد جي تهضر على الجديدة!”
وما نسا بنربيعة فضيحة “سرقة” مشروع جبران خليل جبران، وقالها بصراحة:
“السطو على مجهودات الجماعة ما غاديش يعطيك وزن سياسي… الظهور فآخر لحظة قدّام الكاميرا ماشي شغل ولا إنجاز.”
وختم الرئيس البلاغ برسالة قاصحة ما فيها لا تلميح لا دبلوماسية:
“اللي باغي يدير مسرحية… يمشي لشي خشبة أخرى.
الجديدة ماشي جسر لطموحات مصطنعة، وما عمرها غتكون ملعب لسياسيين كيقلبو على البوز.”
وبين السطور، الرسالة كانت واضحة:
الجديدة عندها رجالها، مؤسساتها، وشرعيتها… وماشي مستعدة تولي حلبة صراع ديال طموحات شخصية كتسوّقها الشبيبة الاستقلالية.
