كود كازا//

الجدارمية بمركز خميس متوح تمكنو صباح اليوم، السبت 27 دجنبر 2025، في حدود الحداش ديال الصباح، يحبطو عملية ديال ترويج المخدرات بدوار العبابدة، التابع لجماعة وقيادة متوح، دائرة سيدي إسماعيل بإقليم الجديدة.

العملية جات من بعد ما رصدات الدورية ديال الجدارمية سيارة من نوع (هيونداي تيكسون)، كان كيسوقها شخص مبحوث عليه فقضايا ديال الاتجار فالمخدرات. ومنين حس براسو محاصر، المشتبه فيه خلا السيارة وهرب عبر الحقول، مستغل التساقطات المطرية الكثيفة اللي عرفتها المنطقة.

تفتيش السيارة كشف على كمية مهمة ديال المخدرات، حيث تم حجز 36 كيلوغرام ديال الكيف سنابل و6 كيلوغرامات ديال طابا أوراق. وجرى نقل السيارة للمحجز البلدي، فحين غادي يتم تسليم المحجوزات لإدارة الجمارك بالجديدة، وفق المساطر القانونية المعمول بها.

هاد العملية كتدخل فإطار المجهودات اللي كيقوم بها الجدارمية لمحاربة ترويج المخدرات وتجفيف منابعها، بهدف الحفاظ على أمن وسلامة المواطنين واستقرار المنطقة.