گود سبور//

خرجت الجامعة الملكية المغربية لكرة القدم، رابحة فـ المشكل اللي خلقوه روما الطالياني فريق نايل العيناوي، اللي بغاو يشدو اللاعب حتى اليوم الاثنين 15 ديسمبر 2025، الموعد اللي خاصهم يطلقوه للمنتخب الوطني المغربي باش يلتحق بمعسكر الأسود استعدادا لكاس إفريقيا.

وأعلن گاسبيريني مدرب روما الطالياني، صباح اليوم الاثنين على لائحة الفريق استعدادا لمواجهة فريق كومو فـ العشية، ضمن منافسات بطولة الطاليان، وما كاينش الدولي المغربي نايل العيناوي فـ هاد لاليست، وهذا الشي كايعني أن روما تراجعو على الاحتفاظ بنايل العيناوي حتى اليوم الاثنين 15 ديسمبر، بعد الطعن اللي تقدمت به الجامعة الملكية المغربية لكرة القدم عند الاتحاد الدولي لكرة القدم، بخصوص رغبة النادي الطالياني الاحتفاظ باللاعب المغربي حتى اليوم.

وكان الاتحاد الدولي لكرة القدم، أعلن أن يوم 15 ديسمبر 2025، هو موعد التحاق اللاعبين الأفارقة المشاركين فـ كاس افريقيا بالمنتخبات ديالهم، وان الأندية خاصهم يطلقو اللاعبين فـ هاد التاريخ.