عفراء علوي محمدي- كود//

رجعات مخاوف الإغلاق المفاجئ تراود المغاربة المقيمين فالخارج  من جديد، واللي جاو للمغرب باش يدوزو العطلة هنا، لكن ولاو خايفين ترجع الحدود تتسد على غفلة، مع ارتفاع عدد الإصابات بفيروس كورونا المستجد، واخا الحملة ديال التلقيح غادية مزيان.

الإصابات اليومية بدات كتقرب ل10 الاف فاليوم الواحد، عدد حالات الوفاة والناس اللي كيدخلو للإنعاش كيتزايدو نهار على نهار، بزاف ديال الناس خافين، وولا هذ السيناريو وارد ومحتمل، بحيث المغرب فاي لحظة يقدر يسد كلشي، ويضحي بالسياسة والاقتصاد باش يحمي شعبو من كل خطر محتمل، خصوصا وأن السلالة متحورة بدات كتنتشر شوية بشوية.

العطلة ديال مغاربة الخارج ولات كلها خوف وترقب وقلق، بحيث ولا خوف كبير من ان الحكومة تقدر تتخذ إجراءات صارمة للحد من حدوث موجة ثالثة للفيروس، ومابقى والو للدخول المدرسي، وكاينين ناس خاصها ترجع لخدمتها، والى بقات فالمغرب تقدر تخسرها فخطرة.

وللإشارة، كان المغرب سجل روكور صاروخي كيخلع ديال الإصابات بكورونا غير نهار لاربعاء اللي فات، بحيث تقاسو 9428 فاقل من 24 ساعة، وهو اعلى روكور كيسجلو المغرب من نهار بان الوباء عندنا ف2 مارس 2020.